bagagang mamanjek samak
biaso tumbuah di baluka
roman saujuik kacang paga.
Buahnyo baduyun-duyun
kulik bakilek kuniang hamek
haluik babulu anak kuciang
itulah miang sabananyo.
Mako salain banamo bio-bio
kacang miang namonyo juo
jarang lah urang nan tak tau.
Dek inyo bagagang panjang
bio-bio manjala tanah
supayo tagak bak urang pulo
tapaso malilik batang bagantuang ka rantiang kayu.
Banyak kacang kacang
kacang miang paliang manggata.
Gata dek miang bio-bio taseso sabatang tubuah
jantuang lah mintak gawuik pulo.
Ba’a bana sakik padiahnyo
sulik lah awak mangatokan
antah kok urang nan marasai.
Sumpah, kutuak, caci-makian, upek caraco,
caruik kungkang, dibanci salamo hiduik.
Jangankan ka mandakek
mandanga namo sajo apolagi maliek
ka api mamunahkannyo
tunggua dikikih dilantiangkan
baitu doso kacang miang.
Nyampang kok kito manusia mamakai sifaik bio-bio
sakampuang kanai miangnyo manggata turun-tamurun.
Jauahkan laku nan baitu
buliah salamaik hiduik awak.
Cubo wa’ang bayangkan
dek asuang jo pitanah
gunjiang kian kincah kamari
bisa mararak kasiah sayang
urang balaki di sibaknyo.
Tibo didagang panggaleh lahabih di timpo kabakaran
tansano api nan mamakan tingga juo puntuang baronyo.
Taga dek dangki urang toke manjadi anak buah.
Santano kantua ditimponyo direktur
masuak manajer dipecat tagak, sekretaris tabaok rendong.
Hati-hati dalam bagaua,
banyak batamu bio-bio nak ulek bulu namonyo juo.
Karena bak cando jujur muluik manih baso katuju,
awak talen parlente pulo panampilan pun mayakinkan.
Ado kalonyo potongan dukun paham rasio
dalam batin pandai manakok hati urang.
Kadang-kadang bantuak ulama,
hadihnyo balapiah-lapiah,
ayatnyo bak ilia-ilia, iko dalia iko ma’ana.
Ado juo rupo sarjana
tau jo pasal undang-undang hukum pidana jo perdata.
Geleknyo baragam,
jo kecoh nan nyato inyo manyerak miang
cundang kabaji nan nyo Pura-pua ibo,
kasihan katonyo ingin nak manolong
barisuak urang batagak gaua gawik gapai sapanjang jalan
baliau mangakeh di subaliak.
(Disadur dari Kaset: Pitaruah Ayah, Yus Dt Parpatiah)
Tidak ada komentar:
Posting Komentar