Bulittinggi Tempo dulu

Blog Pasambahan Datuak - http://www.freewebs.com/limaukampuang
Benteng Tertua di Indonesia - http://arkeologi.web.id/articles/
Indonesia tempo dulu - http://tempodoeloe.com/category/old-batavia/
Padang tempo dulu - http://cilotehleaks.blogspot.com/
Sedjarah Hindia Belanda  - http://walentina.waluyanti.com/history-politics/ 
Legenda nusantara - http://legendanusantara.wordpress.com




        Nasehat buat keponakan    







Anak kanduang sibiran tulang 

Buah hati ayah djo Bundo

Ubek Jariah  palarai damam

Sidingin sampai dikapalo

Nan kanduang kamanakan mamak

Rangkaian hati urang sakoto

Mamak batutua cubolah simak

Dangakan mamak bacarito

Kok indak salah mamak mahetong

Diagak agak sampai kini

Tatkalo kamanakan kadibaduang

Mamak maliek partamo kali

Ayah badoa pado nankuaso

Bundo bakahandak pado illahi

Kok layie anak nan dicito

Ka pangganti badan diri

Diwarih nan kabajawek

Dipusako nan kabatolong

Indak dibilang jariah  jo panek

Lamo jo maso indak dihetong

Lah layie anak laki-laki

Umpamo ameh jo parmato

Ibaraik cincin taikek dijari

Ka panyongsong tamu nan tibo

Katungkek pamaniah jalan

Ka karih pamaga adat

Panjago warih katurunan

Ka pambela dunia akhirat

Tanak labu ditaratak di hari pagi

Dakek  ampang ditanam ubi

Anak bungsu nan indak baradiak lai

Capeklah gadang bundo harok kamananti

Kini kamanakan alah baranjak dewasa

Akan pai malangkah ka lingkungan urang

Tiado bakal yang dapek mamanda barikan

Hanyolah pasan dan jo pitaruah

Kok mangaji dari alif

Kok mambaco dari muko

Manjadilah urang nan ariah

Sarato jo bijaksano

Urang arih bijak sano

Urang nantahu di angin nan kabasiru

Tahu diombak nan kabadabua

Tahu didahan nan kamaimpok

Tahu dirantiang nan kamancucuak

Tahu diujung kato putuih

Tahu di alu kamanaruang

Tahu dicakak ka mangaik

Tahu diereng dengan gendeng

Kok bakato dibawah bawah

Kok manyauak di hilie hilie

Nagari  rantau banyak batuah

Urang alim banyak nan sati

Anak daro duduak di rumah

Mambalakang kabiliak dalam

Jadi urang sumando indaklah mudah

Paralu paratian nan mandalam

Kok kusuik sato manyalasaikan

Kok karuah sato manjaniahkan

Panjang nan kamangarek

Singkek nan kamauleh

Kamanakan kanduang dangakan mamak

Bumi baputa hari baganti musim barubah

Nan mudo katingga nantuo kapai

Nan ketek katumbuah

Kamanakanlah yang akan tingga manjawek pusako jo warih

Niniak moyang bapasan

Jadilah sarupo kayu gadang di tangah padang

Tinggi tampak jauh dakek jolong basuo

Pacik paham arek arek

Taguahkan iman kuaik kuaik

Jan sumbarang kamari rabah

Jan sarupo batungkek batang padi

Jan sarupo babandua ka batang bayam

Paham jan tagadai

Budi jan tajua

Ingek pitaruak ayah jo bundo

Siang jadikan tungkek

Malam jadikan suluah

Bajalan dinan luruih

Bakato dinan bana

Kok elok untuang palangkahan

Dek masin lidah matohari

Dek dingin tangan nan tuo

Talakiak rabuang jadi batuang

Nyo baurek bagumpa gadang

Nyo babatang barueh rueh

Badaun rimbun rancak bantuaknyo

Tabiang diagak jannyo runtuah

Lurah mamuji kalindungan

Bukik diateh indak taseso

Badarun pintak kalangik

Harok mamohon  ka nankuaso

Andaknyo kamanakan

Bak ambalau lakek kahulu

Bak pisau diasah tajam

Bak Kariah Lenggo Geni

Basimpai  jo kasiah sayang 

Bahulu jo kabanaran

Barakek kato saiyo

Sanyawo tak carai tangga

Tarapuang samo anyuik

Tarandam samo basah

Kabukik samo mandaki

Ka lurah samo manurun

 

Tatungkuik samo  makan tanah

Tatilantang samo makan ambun

Saciok bak ayam

Sadanciang bak basi

Rang Talu pai ka Pakan

Singgah kadunsanak di tanjuang balai

Sado nan paralu lah bapapakan

Antah  tasimak dinan mamakai

Manolah kamanakan kanduang denai

Jarek samato ayah bundo

Hubungan nyawo rangkaian hati

Hulu jantuang limpo bakuruang

Achir kato cukuiklah rasonyo mamanda bapasan

Lah panuah jo kaba carito

Mamanda ucapkan salamaik jalan

Malangkahlah dengan iman didado

Kun kato Allah

Fayakun kato Muhammad

Tagak basarato  Allah

Bajalan basarato Muhammad

Amin ya Rabbil Alamin

Ass  Wr. Wb.