KIAMBANG

Jikok Kiambang ka dibaco,

itulah samalang-malang untuang.

Iduik nyo manyisiah-nyisiah,

kok inggok manapi-napi,

katangah takuik dek galombang.

Lai baurek indak cukam,

tajuntai kapalang turun,

Walaupun tumbuah di tapi,

tarandam-randam nyo tak basah,

tarapuang-rapuang nyo tak anyuik.

Biduak lalu awak basibak,

dek angin badan batundo,

apolagi riak nan mahampehkan.

Baa lah kajadinyo

Kiambang adolah simbol manusia lamah darah bamental loyo.

Sadangkan iduik ko parsaingan nak,

parang ganas medannyo kejam,

tekad mambantu nan partamo,

misiu nan kaduo.

Ragu-ragu dalam basikap,

bimbang satiok kaputusan,

alamaik awak mati,

satokok awak lah kalah sabalun parang.

Urang panggamang mati jatuah nak,

urang pandingin mati anyuik,

takuik jo bayang-bayang surang.

Dek sabab karano itu,

yakin-yakin jo pandirian.

Jaan bak payuang tagajai pasak jo lamah bingkai,

Sa ambuih angin lalu,

awak lah kucuik mati aka.

Tapi naiakkan panji-panji awak tu,

bangkikkan Nur Muhammad,

kipehlah baro tungku batin.

Sakali masuak ka galanggang,

pantangkan babaliak pulang.

Patah sayok batungkek paruah,

lagu nan usah tabangkalai,

cilako ayam disabuangan.

(Disadur dari Kaset: Pitaruah Ayah, Yus Dt Parpatiah)